HAFATRY NY SYNODA LEHIBE XXXI
10, 11, 12 Novambra 2006
Domaine des Chamerolles - Chilleurs Aux Bois (Orléans)
« Miezaha mitady fihavanana amin'ny olona rehetra ary fahamasinana. » (Heb.12/14a)
Ny Synoda Lehibe faha-31 n'ny FPMA izay nivory teto amin'ny « Domaine de Chamerolles » 45170 Chilleurs aux Bois, ny 10-11-12 novambra 2006, mamangy ny Tafo 34 sy ny Fiaraha-mivavaka ary ny kristiana rehetra eto amin'ny FPMA.
Hampitomboina mandrakariva ho anareo anie ny fahasoavana sy ny fiadanana avy amin'Andriamanitra Ray sy Jesoa Kristy Tompo sady Lohan'ny Fiangonana.
« Miezaha mitady fihavanana amin'ny olona rehetra ary fahamasinana. »)
Izany teny faneva izany no nanorenana ity Synoda faha-31 ny FPMA ity.
Koa ireo mpivory niisa ho 108 avy amin'ny Tafo sy Faritany, Sampana, Vaomiera ary Departemanta FPMA, rehefa nivory nandinika ny fiainan'ny FPMA, nijery ny lasa ary nibanjina ny ho avy, dia mandefa izao hafatra izao ho an'ny Fiangonana manontolo.
1. « Miezaha… » : baiko mitaky fikirizana, tsy mamela hipetrapetraka fotsiny fa mitady hetsika faingana, finiavana ary faharetana mba hahatratra tanjona kendrena.
Noezahina ny hijery sy hifampizara ny fiainan'ny FPMA nandritra izay roa taoana izay teo amin'ny sehatra rehetra. Koa ao anatin'ireny dia marihina tsara fa lavorary ny fandoavana ny fiveloman'ny Filoha Synodaly, araka ny fanapahan-kevitry ny synoda FPMA faha-30 tany Nancy, nanomboka ny volana Jolay 2005 ka mandraka ankehitriny. Koa isaorana be dia be ny Tafo rehetra sy sehatra asa rehetra eto amin'ny FPMA tamin'ny ezaka nanatanterahana izany.
Vita ary nankatoavina ny fitantanam-bolan'ny FPMA taona 2005 sy 2006.
Ny asan'Andriamanitra dia mila mpanompo vonona, feno fanoloran-tena sy fitiavana ary fanetren-tena. Koa nofidina tamin'ity Synoda ity ireo mpiasa amin'ny sehatra samihafa eto amin'ny Foibe FPMA, anisan'ireny :
- 1. Birao Foibe:
Filoha synodaly : Pasitera Andriamarohasina Ravalitera Jean
Filoha mpanampy mpitandrina : Pasitera Théodore Randriamanantena
Filoha mpanampy laika : Atoa Jean-Solo Rafidinarivo
Mpitan-tsoratra : Atoa Tiana Radison
Mpitahiry vola : Atoa Herintsoa Rasidimanana
Mpandraharaha ny vola : Atoa François Ramialison
Mpanolon-tsaina : Pasitera Seth Rasolondraibe
- 2. Mpandini-bola:
Atoa Solo Rabarimanana
Atoa Ramahatafandry Andrianavelasoa
2. « Miezaha mitady fihavanana… » : azo adika koa hoe fiadanana sy fisainana hisiana filaminana milaza fahafenoana eo amin'ny fiainana izany.
Satria moa ny zava-dehibe vaindohan-draharaha voalahony amin'ny izao tanoa 2006 2007 izao dia ny hahatafindirantsika ho mpikambana feno (mpikambana mpiara-miasa isika izao/membre associé) ao amin'ny FPF - Fédération Protestante de France - dia mahafaly ny mampahafantatra antsika fa mizotra tsara ny dingana rehetra koa raha sitrapon'Andriamanitra dia amin'ny « Conseil National » Desambra 2006 sy ny « Assemblée Générale » Martsa 2007 izao no hanapahana hevitra ny handraisan'ny FPF antsika.
Nambara teo amin'ny fivoriana koa ny fanapahan-kevitry ny mpiandraikitra Foibe FJKM ny handraisana indray ny fiaraha-miasa amin'ny FPMA.
3. « Miezaha mitady fihavanana amin'ny olona rehetra… » : Izany fihavanana izany dia azo adika ho fahatanterahan'ny fihavanana amin'Andriamanitra. Koa mitatra ny sehatr'asa hitorian'ny FPMA ny filazantsara, ary noraisina tamin'ny fomba ofisialy ny fiaraha-mivavaka Annemasse sy Perpignan.
Nomena ainga vaovao ihany koa ny fitaovam-pifandraisana eto amin'ny FPMA, ary ankoatry ny Gazety Vatsy dia hanangana « Radio-Internet » ny FPMA
4. « Miezaha mitady fihavanana amin'ny olona rehetra sy fahamasinana » : Olona nanokan-tena ho an'Andriamanitra ny kristiana, ary aoriny ho fiangonana mba hanao ny asany ety an-tany.
Hahazoana manatanteraka izany dia namafisina tamin'ny ity Synoda ity ny tokony hananan'ny tafo tsirairay avy na ny faritany Mpitandrina matihanina. Koa amin'izao fotoana izao dia efa niroso ho amin'izany ny Tafo Aix-Marseille sy Tafo Grands-Champs. Ankehitriny dia miisa ho efatra ireo tafo efa manana mpitadrina matihanina eto amin'ny FPMA.
Natsangana tamin'ity synoda ity ny vaomiera manokana iray mitondra ny anarana hoe : VMMM (Vaomiera Mitrandraka ny momba ny Mpitandrina Matihanina) izay handinika sy hanentana ary hanampy ny tafo amin'ny fanatanterahana izany.
Notokanana ho mpitandrina FPMA nandritra izao Synoda izao koa, i Pastera Zaranaina Andrialampison.
Nanapa-kevitra koa ny Synoda ny hametrahana ny loholona isaky ny tafo izay maniry izany araka ny fitsipika nolaniana.
Tohizana sady hamafisina ny asan'ny SAP (Soritr'Asam-Piangonana), koa ankoatry ny lasy fiofanana nasionaly dia hisy ihany koa ny lasy karakaraina eo anivon'ny faritany.
Koa rehefa avy namaritra ny làlan-kizorana ho amin'izao roa taona ho avy izao ny solon-tenanareo teto amin'ny Synoda dia manentana sy mampahery ary mitsodrano anareo mba hahefa be eo amin'ny asa fanompoana izay ijoroantsika ho vavolombelon'i Kristy amin'ny fikendrena sy fanamafisana ny fiombonana ho amin'ny asa misiona ho fanasitranana izao tontolo izao sy hizarana fiainana be dia be.
«Ary ho an'Izay mahay manao mihoatra noho ny zavatra rehetra, eny mihoatra lavitra no izay rehetra angatahintsika na heverintsika aza, araka ny hery izay miasa ato amintsika, ho Azy anie ny voninahitra ao amin'ny fiangonana sy ao amin'i Kristy Jesosy hatramin'ny taranaka farany indrindra mandrakizay mandrakizay. Amen. » Efesiana 3 :20-21.
« Domaine de Chamerolles » 45170 Chilleurs aux Bois, ny 12 novambra 2006
Ny mambra ny Vaomieran'ny Hafatra
Filoha : Pst Falimanana Raharindranto
Faritany Avaratra Andrefana : Pst Marc Vincent
Faritany Avaratra Atsinanana : Pst Dimby Ratovonarivo sy Atoa Daniel Rasamimanantsoa
Faritany Afovoany Andrefana : Pst Harizaka Razafimbololona
Faritany Afovoany Atsinanana : Pst Emma Randrianandrasana
Faritany Atsimo Andrefana : Pst Elysé Andriamiandra
Faritany Atsimo Atsinanana : Atoa Julien Rabarison
PS : Izao hafatra izao dia notinapaky ny Synoda Lehibe faha-31.